Viðskipti | mbl | 13.4.2011 | 14:03

Fellst á tímabundna aðstoð til Byrs

Eftirlitsstofnun EFTA (ESA) ákvað í dag að samþykkja tímabundið ríkisaðstoð til stuðnings við Byr hf.

ESA óskar eftir því að íslensk stjórnvöld leggi fram innan sex mánaða áætlun um endur-skipulagningu nýja Byrs eða slit þess félags. Segist ESA ekki geta tekið endanlega afstöðu til ríkisaðstoðarinnar fyrr en slík áætlun liggur fyrir.

Í kjölfar yfirtöku Fjármálaeftirlitsins á Byr sparisjóði í apríl 2010 stofnaði íslenska ríkið Byr hf., sem er hlutafélag að fullu í eigu ríkissjóðs. Hefur nýi Byr tekið yfir allar eignir, vissar skuldir og starfsemi gamla Byrs, sem er í slitameðferð. Er fyrirtækið nú fjórði stærsti banki á Íslandi.

Ríkisaðstoðin felst einkum í 900 milljóna króna hlutafjárframlagi ríkissjóðs til stofnunar nýja Byrs og samningi um víkjandi lán sem getur numið allt að 5 milljörðum króna. Segir ESA, að með þessum ráðstöfunum sé nýja Byr gert kleift að uppfylla kröfur Fjármálaeftirlitsins um 16% eiginfjárhlutfall.

ESA segir, að ríkisaðstoðin auðveldi endurfjármögnun nýja Byrs og uppgjör á kröfum milli gamla og nýja bankans, sem leiði að lokum til þess að kröfuhafar í gamla Byr eignist um 95% hlutafjár í nýja Byr, en hlutur ríkisins verður um 5%. Markmið aðstoðarinnar sé að viðhalda tiltrú á íslenskt fjármálakerfi, en líklegt sé að hrun nýja Byrs hefði orðið alvarlegt áfall, einkum fyrir innlánaeigendur á Íslandi.

Við núverandi aðstæður getur Byr ekki mætt fjárþörf sinni á fjármálamörkuðum. Að mati ESA eru ráðstafanirnar viðeigandi og í samræmi við aðsteðjandi vanda, þar sem þær geri nýja Byr kleift að uppfylla lögbundnar eiginfjárkröfur jafnframt því að undirbúa áætlun um endurskipulag á rekstri sem miðar að því að tryggja arðbæran rekstur til frambúðar.

Það dragi úr hugsanlegum neikvæðum áhrifum aðgerðanna á samkeppni að eigendur að gamla Byr hafi að fullu tapað stofnfé sínu og verði ekki bætt það tap. Kröfur lánadrottna gamla Byrs hafi jafnframt verið færðar niður.