Bakslagið kom fyrr en Seðlabankinn bjóst við

Samkvæmt nýútgefnum Peningamálum Seðlabanka Íslands verður hagvöxtur minni í ár en bankinn gerði ráð fyrir í febrúar. Ástæðan fyrir þessu að mati bankans er sú að vöxtur innlendrar eftirspurnar beinist meira að innflutningi en gert hafði verið ráð fyrir. Auk þess kom bakslagið í hagvöxt fyrr en bankinn bjóst við, eða í kjölfar þess að hann hófst.

Í febrúar spáði Seðlabankinn 2,8% hagvexti á þessu ári en samkvæmt spánni sem gefin var út í tengslum við vaxtarákvörðun bankans í dag þá er aðeins gert ráð fyrir 2,3% vexti landsframleiðslunnar á árinu. Einnig er hagvaxtarspáin fyrir næstu tvö ár lakari en gert ráð fyrir tæplega 3% hagvexti á næstu árum í stað ríflega 3% vexti.

Sérfræðingar bankans gera ráð fyrir áframhaldandi vexti einkaneyslu í krafti minni sparnaðar heimilanna auk þess að þau nýti sér endurgreiðslur á ofteknum afborgunum gengistryggðra lána í neyslu. Einnig gerir Seðlabankinn ráð fyrir að hækkun eignaverðs og lækkun vaxta muni styðja við einkaneysluna.

Seðlabankinn spáir minni hagvexti þó svo að gert sé ráð fyrir „kröftugri fjárfestingu“ í álframleiðslu og tengdum iðnaði en í febrúarspá bankans.

Fram kemur í Peningamálum Seðlabankans að sérfræðingar bankans standa við það mat að landsframleiðslan hafi byrjað að aukast um mitt ár í fyrra. Hinsvegar segir í skýrslunni að bakslagið sem hafði verið við á fyrri hluta þessa árs hafi komið fyrr - eða strax á fjórða ársfjórðungi í fyrra. Skýrist það að mestu af kröftugri innflutningi en áður var spáð.

• 1 blogg um fréttina

Bloggað um fréttina

• S i g u r ð u r S i g u r ð a r s o n: Seðlabankinn þorir ekki að gagnrýna ríkisstjórnina