Fitch breytir horfum í stöðugar

Alþjóðlega matsfyrirtækið Fitch Ratings breytti í dag horfum fyrir lánshæfiseinkunn Íslands úr neikvæðum í stöðugar. Einkunnin er hins vegar óbreytt, BB+, sem þýðir að íslensk ríkisskuldabréf eru flokkuð í svonefndum ruslflokki. 

 Að sögn Paul Rawkins, sem fer með málefni Íslands hjá Fitch, hefur hættan á að óleyst Icesave-deila leiði til þess að fjármögnun í tengslum við efnahagsáætlun stjórnvalda og Alþjóðagjaldeyrissjóðsins verði dregin til baka minnkað verulega. Einnig er bent á í greinargerð með ákvörðun Fitch að stjórnvöld séu fullviss um að endurheimtur úr þrotabúi Landsbankans muni skila á bilinu 90-100% af kröfum vegna Icesave-reikninga.

Að mati Fitch þá hafa horfurnar hér á landi skánað að undanförnu. Þrátt fyrir að mikill samdráttur hafi verið í hagkerfinu í fyrra telja sérfræðingar Fitch að ákveðinn stöðugleiki sé að komast á og hagvaxtarspá þeirra fyrir þetta ár hljóðar upp á 2%.

Hinsvegar telja sérfræðingar Fitch að nauðsynlegt sé að ráðast í víðtækar aðgerðir vegna skuldsetningar einkageirans. Fram kemur í greinargerðinni að slíkar aðgerðir séu forsenda viðreisnar hagkerfisins og að stöðugleiki komist á fjármálageirann. Einnig er nauðsynlegt að viðhalda hagstæðum viðskiptajöfnuði sem og auka á gjaldeyrisforðann til þess að skapa forsendur þess að hægt sé að afnema gjaldeyrishöft og þar af leiðandi fá skilaboð markaðarins um raunverulegt verðgildi krónunnar.

Fitch segir í greinargerðinni að frekari ákvarðanir um lánshæfiseinkunn íslenska ríkisins muni meðal annars taka mið að því hvort lokið verði við efnahagsáætlun AGS, hvort að skýr merki um viðsnúning og hagvöxt sjáist í hagkerfinu og hvort áfram verði haldið að koma böndum á skuldasöfnun ríkissjóð innanlands og erlendis. Tekið er fram að meðaltekjur á Íslandi séu óvenjuháar samanborið við þau ríki sem eru í ruslflokki hjá Fitch og það sama megi segja um viðskiptaumhverfið hér á landi. Hinsvegar er nauðsynlegt að mati sérfræðinga matsfyrirtækisins að ráðast í aðgerðir vegna skuldsetningar einkageirans, afnema gjaldeyrishöft og endurreisa eðlileg samskipti við erlenda kröfuhafa ásamt því að koma á stöðugleika á gengismálin og árangur í þeim efnum muni ráða mestu um hvort að lánshæfiseinkunnin verði hækkuð þannig að íslenska ríkið teljist fjárfestingahæfur útgefandi skuldabréfa.