Viðskipti | mbl | 13.6.2011 | 23:15

Spáir grísku þjóðargjaldþroti

Útsýni yfir Akrópólishæð Aþenu. Kristinn Ingvarsson

Matsfyrirtækið Standard & Poor's hefur lækkað lánshæfismat Grikklands og vermir landið nú neðsta sæti matsfyrirtækisins yfir lánshæfi ríkja. Telur matsfyrirtækið allt benda til að Grikkland fari í greiðsluþrot.

Þannig hefur matsfyrirtækið lækkað matið niður úr B í CCC og er ákvörðunin m.a. rökstutt með því að líklegt sé að landið fari að minnsta kosti einu sinni í greiðsluþrot fyrir 2013.

Fjallað er um málið á vef breska útvarpsins, BBC, en þar segir að grísk stjórnvöld hafi brugðist við niðurfærslunni með þeim orðum að matsfyrirtækið horfi framhjá viðleitni stjórnvalda í Aþenu til að tryggja endurfjármögnun á skuldum.

Segir þar jafnframt að líklegt sé að Evrópusambandið muni beita sér fyrir endurskipulagningu skulda líkt og þegar ríki lendi í greiðslufalli. Það muni aftur þýða að skilmálarnir verði verri fyrir lánveitendur en fram þessu.

En Grikkir fengu sem kunnugt er neyðaraðstoð frá Evrópusambandinu síðasta sumar vegna greiðsluerfiðleika ríkissjóðs.