Byr beittur dagsektum

Fjármálaeftirlitið beitir Byr dagsektum vegna brot bankans á reglum um skil ársreikninga. Samkvæmt reglum hefði Byr átt að skila inn ársreikningi fyrir síðasta starfsár í mars.

Komið hefur fram að ársreikningurinn verði ekki birtur fyrr en að lokinni sölu á 94% hlut skilanefndar Byrs í bankanum. Búist er við því að salan á bankanum verði frágengin um miðjan þennan mánuð.

Í samtali við Morgunblaðið staðfestir Gunnar Andersen, forstjóri Fjármálaeftirlitsins, að engu fjármálafyrirtæki hafi verið veitt undanþága frá 95. grein laga um fjármálafyrirtæki, en hún kveður á um skil ársreikninga.

Í umfjöllun um málefni bankans segir, að af þessu megi leiða að stofnunin beiti nú Byr dagsektum vegna þessa, en FME getur ekki veitt upplýsingar um aðgerðir gagnvart einstaka fyrirtækjum í þessu samhengi.