Forseti ESB fagnar niðurskurði á Ítalíu

Forseti Evrópusambandsins, Herman Van Rompuy, segir áætlun ríkisstjórnar Ítalíu um stórfelldan niðurskurð í ríkisfjármálum gríðarlega mikilvæga fyrir allt evru-svæðið.

Van Rompuy segist styðja aðgerðir Ítala en hann ræddi við Silvio Berlusconi, forsætisráðherra Ítalíu í morgun.

Berlusconi ræddi í gær við kanslara Þýskalands, Angelu Merkel, og bankastjóra Seðlabanka Evrópu, Jean-Claude Trichet, sem bæði styðja aðgerðirnar. Hann mun síðar í dag ræða við forseta Frakklands, Nicolas Sarkozy og fara yfir áætlunina.

Ríkisstjórn Ítalíu samþykkti á fundi sínum á föstudag áætlun sem hljóðar upp á 45,5 milljarða evra niðurskurð á árunum 2012 og 2013. Þetta þýðir að jafnvægi á að nást í ríkisfjármálum Ítalíu ári fyrr en áætlað var. Meðal annars verða skattar hækkaðir hjá hálaunafólki og skorið niður hjá héraðsstjórnum.

Áætlunin er gerð í kjölfar þess að Seðlabanki Evrópu hóf að kaupa ítölsk ríkisskuldabréf á mánudaginn til þess að koma í veg fyrir að ávöxtun þeirra hækkaði enn meira en orðið var.