Bank of America segir upp þúsundum

Stærsti banki Bandaríkjanna, Bank of America, hyggst segja 3500 starfsmönnum upp á næstunni. Uppsagnirnar eru hluti af endurskipulagningu bankans og ekki er útilokað að nokkur þúsund starfsmenn í viðbót muni missa störf sín.

Enn á eftir að ákveða hversu margir muni missa störf sín í allt, en talið er að það gætu orðið að minnsta kosti 10.000 starfsmenn, það eru 3,5% starfsmannafjöldans. Lokaákvörðunar er að vænta í byrjun næsta mánaðar.

Uppsagnirnar ná til allra deilda bankans og munu koma til framkvæmda í september. Sumum þeirra, sem sagt verður upp, hefur verið kynnt ákvörðunin, öðrum ekki.

Í síðustu viku sagði Brian Moynihan, framkvæmdastjóri Bank of America, að bankinn væri í betri stöðu nú en hann var í kreppunni. Verð hlutabréfa í bankanum hefur lækkað um 47% það sem af er þessu ári.

Fleiri stórir bankar hafa tilkynnt um fækkun starfsmanna. Þannig hyggst breski bankinn HSBC fækka störfum um 30.000 fram til ársins 2013 og breski Lloyds-bankinn mun leggja niður 15.000 störf fram til ársins 2014.

• 1 blogg um fréttina

Bloggað um fréttina

• Haraldur Haraldsson: Bank of America segir upp þúsundum/þetta þyrftum við að gera …