Óttast ekki um einkunn Þýskalands

Fjármálaráðherra Þýskalands, Wolfgang Schäuble, sagðist í dag ekki óttast að landið missti lánshæfiseinkunn sína hjá stærstu matsfyrirtækjum heimsins í ljósi þess niðurskurðar sem gripið hafi verið til, en þýska hagkerfið hefur hæstu einkunn í þeim efnum.

„Á meðan við höldum áfram að framfylgja skynsamlegri stefnu þá þurfum við ekki að óttast neitt,“ sagði ráðherrann við fjölmiðla í Berlín í dag samkvæmt fréttavefnum Thelocal.de.

Hann sagði það óheppilegt að aðeins væru þrjú matsfyrirtæki á Vesturlöndum og gagnrýndi fyrirtækin ennfremur fyrir ýmis mistök. Þau hefðu til að mynda ekki séð alþjóðlegu fjármálakreppuna fyrir.

Þá ítrekaði Schäuble að evruskuldabréf væru ekki á dagskrá á meðan ekki væri um að ræða eina fjármálastjórn innan evrusvæðisins eða einn fjármálaráðherra fyrir Evrópusambandið.

• 1 blogg um fréttina

Bloggað um fréttina

• Páll Vilhjálmsson: Þýskaland milli steins og sleggju