Viðskipti | mbl | 24.9.2011 | 19:32

Íslendingar sluppu betur en Írar

Franek Rozwadowski.

Franek Rozwadowski, fulltrúi Alþjóðagjaldeyrissjóðsins á Íslandi, segir að lánaskilmálar Íra í samkomulagi, sem gert var um fjárhagsaðstoð í lok síðasta árs, séu heldur strangari en skilmálarnir sem Íslendingar sömdu um.

Blaðið Irish Times hefur eftir Roswadowski, að það sé „líklega rétt", að Ísland hafi „sloppið vel" í samanburði við þær aðgerðir, sem Írar þurftu að grípa til í tengslum við lánafyrirgreiðslu sem þeir fengu frá sjóðnum og Evrópusambandinu.

Blaðið segir, að AGS hafi samþykkt kröfur íslenskra stjórnvalda um að hlífa velferðarkerfinu og veitt Íslendingum ársfrest á að skera niður ríkisútgjöld. Frá því Íslendingar gerðu samninginn við sjóðinn hafi fjöldi ríkisstarfsmanna haldist nokkurn veginn óbreyttur og nýlega hafi verið samið um launahækkanir á vinnumarkaði. Þá hafi verið samið um lækkun skulda fyrirtækja og heimila.

Írsk stjórnvöld séu hins vegar í þann mund að tilkynna fjórðu niðurskurðarfjárlögin sem feli í sér enn enn frekari niðurskurð í útgjöldum og þjónustu ríkisins.

Rozwadowski segir í viðtalinu, að Ísland verði samkvæmt áætluninni að grípa til erfiðra aðhaldsaðgerða síðar en ekki hafi verið hægt að krefjast mikils niðurskurðar á fyrsta samningsárinu vegna þess hve landsframleiðslan dróst mikið saman.

Þá hafi Írar ekki átt þann kost að láta gjaldmiðil sinn falla því Írland er á evrusvæðinu.

Steingrímur J. Sigfússon, fjármálaráðherra, segir við Irish Times, að ekkert sé hæft í því að skilmálarnir, sem Íslendingar fengu hjá Alþjóðagjaldeyrissjóðnum hafi verið vægir í samanburði við aðra lánþega. Ísland hafi greitt bankahrunið dýru verði og sé ekki enn komið fyrir vind.

Hugsanlega væri ástæða þess, að Írar þyrftu nú enn að skera niður, sú að þeir hafi verið tregir til að hækka skatta. Hins vegar hefði niðurskurður miklar félagslegar afleiðingar.

Frétt Irish Times