Framtakssjóður kaupir hlut í N1

Framtakssjóður Íslands hefur keypt um 39% hlutafjár í verslunar- og þjónustufyrirtækinu N1 af Arion banka hf. Þar af er 10% hlutur sem fyrrum skuldabréfaeigendur N1 eiga kauprétt á síðar.

Áður hafði Framtakssjóðurinn keypt 15,8% hlut af Íslandsbanka hf. og skilanefnd Glitnis. Segir í tilkynningu frá sjóðnum, að miðað við að kaupréttir í N1 verði nýttir muni Framtakssjóður Íslands fara með tæplega 45% eignarhlut í N1. Stefnt sé að skráningu N1 í kauphöll ekki seinna en á miðju ári 2013.

Í tilkynningu segir Finnbogi Jónsson, framkvæmdastjóri Framtakssjóðsins, að N1 hafi alla burði til að standa sig vel í öflugri samkeppni á neytenda- og fyrirtækjamarkaði á komandi árum. Sjóðurinn  muni leggja áherslu á að bæta rekstur félagsins enn frekar og koma síðan félaginu á hlutabréfamarkað með dreifðu eignarhaldi.

Eftir viðskiptin á Arion banki ekki hlut í N1. Viðskiptin eru gerð með fyrirvara um niðurstöðu áreiðanleikakönnunar og samþykki Samkeppniseftirlits. Verður kaupverðið gefið upp þegar það liggur fyrir og viðskiptunum verður að fullu lokið.

• 1 blogg um fréttina

Bloggað um fréttina

• Páll Vilhjálmsson: Lífeyrissjóðavæðing atvinnulífsins