Vextir hækka

Peningastefnunefnd Seðlabanka Íslands ákvað á fundi sínum að hækka vexti bankans um 0,25 prósentur. Stýrivextir hækka því úr 4,5% í 4,75%.

Greiningardeildir höfðu almennt gert ráð fyrir að vöxtum bankans yrði haldið óbreyttum með fyrirvara um hóflega hækkun líkt og nú er raunin.

Vextir á viðskiptareikningum innlánsstofnana verða því 3,5%, hámarksvextir á 28 daga innstæðubréfum 4,50%, vextir á lánum gegn veði til sjö daga 4,75% og daglánavextir 5,75%.

Segir í ákvörðun nefndarinnar að nýjustu hagtölur og spá Seðlabankans, sem birtist í Peningamálum í dag, staðfesti að efnahagsbatinn hefur haldið áfram, þrátt fyrir að það dragi úr hagvexti í heiminum og óvissa hafi aukist. Gert er ráð fyrir að hagvöxtur verði nokkru meiri í ár og á næsta ári en spáð var í ágúst og að verðbólga verði heldur minni á næstu misserum sakir sterkara gengis krónunnar og minni innfluttrar verðbólgu.

Veruleg óvissa ríkir um þann feril nafnvaxta sem þarf til þess að ná verðbólgumarkmiðinu. Í ljósi efnahagshorfa, áframhaldandi styrkingar gengis krónunnar og hugsanlega óhagstæðrar alþjóðlegrar efnahagsþróunar virðist núverandi vaxtastig um það bil við hæfi á komandi mánuðum. Horft lengra fram á veginn verður hins vegar nauðsynlegt að draga úr núverandi slaka peningastefnunnar eftir því sem efnahagsbatanum vindur fram og dregur úr slaka í þjóðarbúskapnum. Að hve miklu leyti þessi aðlögun á sér stað með hærri nafnvöxtum fer eftir framvindu verðbólgunnar.

• 1 blogg um fréttina

Bloggað um fréttina

• Jón Ingi Cæsarsson: Meðan krónan er gjaldmiðill verður þetta svona.