Segja ríkisstjórnina ekki standa við samninga

Það að stjórnvöld hyggist brjóta samkomulag sitt við stóriðjufyrirtæki er grafalvarlegt mál og dregur enn frekar úr trúverðugleika þeirra gagnvart erlendum fjárfestum.

Þetta segir Orri Hauksson, framkvæmdastjóri Samtaka iðnaðarins, í Morgunblaðinu í dag um áform ríkisstjórnarinnar um að hækka kolefnisskatt frá og með ársbyrjun 2013 og leggja hann ásamt skatti á raforku til frambúðar.

Þorsteinn Víglundsson, framkvæmdastjóri Samtaka álframleiðenda, tekur í sama streng og segir að þessi áform stjórnvalda sendi þau skilaboð til erlendra fjárfesta að ekki sé hægt að treysta á gerða samninga, en í umsögn samtakanna um frumvarpið kemur fram að þau telji ákvæði frumvarpsins skýrt brot á samkomulaginu auk þess sem þau brjóti gegn ákvæðum í gildandi fjárfestingarsamningum. Þorsteinn bendir á að þessi skilaboð beinist ekki eingöngu að þeim erlendu fyrirtækjum sem nú þegar eru með starfsemi hér á landi heldur einnig að þeim fyrirtækjum sem hafa sýnt fjárfestingu í stóriðju áhuga.