Refsiaðgerðir hafa mikil áhrif á olíuverð

Heimsmarkaðsverð á olíu fer í 250 Bandaríkjadali tunnan ef þær hertu refsiaðgerðir sem  Bandaríkin og Evrópusambandið hóta nú gagnvart Íran verða að veruleika, segir formaður efnahagsnefndar íranska þingsins.

Arsalan Fathipour segir að ef viðskiptabann verði sett á olíu- og gasviðskipti við Íran þýði það einfaldlega að olíuverð muni hækka upp úr öllu valdi. Í síðustu viku samþykktu utanríkisráðherrar ESB-ríkjanna að setja bann á viðskipti við 180 írönsk fyrirtæki og einstaklinga og vöruðu við því að jafnvel yrði sett viðskiptabann á írönsk fjármála- og olíufyrirtæki.

Á sama tíma er Bandaríkjaþing að íhuga setningu laga sem beint er gegn Seðlabanka Írans, en greiðslur fyrir olíuviðskipti fara í gegnum hann.

Á föstudagskvöldið var lokaverð hráolíu á NYMEX markaðnum í New York 100,96 dalir tunnan á meðan tunnan af Brent Norðursjávarolíu kostar 109,94 dali í Lundúnum. 

• 1 blogg um fréttina

Bloggað um fréttina

• Steinar Þorsteinsson: Það er planið.