„Skuldaskrímslið“ stefnir á Holland

Hollensk heimili skulda hlutfallslega meira í húsnæðislánum en nokkur önnur þjóð á evrusvæðinu. Skuldsetningin þýðir að versnandi kjör á lánamörkuðum munu koma hart niður á hollenskum almenningi og rýra lífskjör hans.

Skuldir hollenskra heimila sem hlutfall af árstekjum námu um 250% árið 2010, að því er fram kemur í fréttaskýringu á vef Wall Street Journal. Til samanburðar var hlutfallið um 130% í Portúgal og ríflega 100% í Finnlandi sama ár.

Meðaltalið á evrusvæðinu var þá 98,5%.

Athygli vekur að í Þýskalandi var hlutfallið aðeins 88,9% en það þýðir að hollensku heimilin skulduðu hartnær þrefalt meira sem hlutfall af árstekjum.

Þegar verðbólgan rýrir kjör almennings er stundum talað um verðbólgudrauginn. Önnur efnahagsleg forynja leit dagsins ljós í fréttaskýringu EU Observer fyrir rétt rúmu ári þegar skuldaskrímslið í Evrópu var fyrst nefnt á nafn.

Skrímslið hefur þegar fellt leiðtoga í Evrópu og ógnar nú tilverugrundvelli evrunnar.

Það þykir styrkja stöðu Hollands að skuldir hins opinbera sem hlutfall af þjóðarframleiðslu eru aðeins um 64%, auk þess sem góður afgangur er af viðskiptum við útlönd.

Þá er atvinnuleysi í Hollandi aðeins um 4,3% en það þýðir aftur að almenningur hefur ekki neyðst til að selja fasteignir sínar vegna atvinnumissis. Á hinn bóginn hefur fasteignaverð staðið í stað eða lækkað síðan fasteignabólan sprakk 2008, að sögn Wall Street Journal. 

• 1 blogg um fréttina

Bloggað um fréttina

• Haraldur Haraldsson: „Skuldaskrímslið“ stefnir á Holland ///Þetta tekur flest ESB ríki!!!!!!