Alþjóðabankinn varar við samdrætti

Alþjóðabankinn hefur lækkað hagvaxtarspá fyrir yfirstandandi ár og segir að skuldakreppa í þróuðum ríkjum geti valdið meira umróti í efnahagsmálum en fjármálakreppan árið 2008.

Bankinn spáir því nú að hagvöxtur í heiminum verði að jafnaði 2,5% á þessu ári og 3,1% á því næsta en hafði áður spáð 3,6% hagvexti bæði árin. 

„Hagkerfi heimsins er nú á afar erfiðu skeið sem einkennist af miklum veikleikum og hættu á samdrætti," segir í skýrslu Alþjóðabankans. 

Segir bankinn að þótt svo virðist nú sem tekist hafi að ná tökum á vandanum sé áfram hætta á mun víðtækari stöðnun á fjármagnsmarkaði og alþjóðlegri kreppu, svipaðri og varð í kjölfar gjaldþrot bandaríska bankans Lehman Brothers haustið 2008.  Rík lönd geti ekki treyst á að fjármálamarkaðir vilji fjármagna ríkissjóðshalla þeirra og afborganir af skuldum. 

Verði það raunin að rík lönd geti ekki sótt lánsfé á markaði gæti það haft í för með sér mun víðtækari kreppu sem hefði áhrif á fjármálastofnanir beggja vegna Atlantshafs. „Heimurinn gæti lent í samdrætti sem yrði jafnvel meiri en 2008/2009," segir Alþjóðabankinn.  Standi ríki heims frammi fyrir slíku gætu þau þurft að skera niður útgjöld og það muni enn auka á erfiðleikana.

Alþjóðabankinn áætlar að hagvöxtur í heiminum hafi verið 2,7% á síðasta ári. Dregið hafi úr vexti í þróuðum ríkjum ef undan eru skilin Japan og Bandaríkin. Einnig hafi dregið úr umsvifum stórra þróunarríkja á borð við Brasilíu og Indland, m.a. vegna opinbers niðurskurðar. 

Tilkynning Alþjóðabankans

• 1 blogg um fréttina

Bloggað um fréttina

• Geir Ágústsson: Hagfræði Alþjóðabankans er gagnslaus