Óvissu um vaxtaforsendur gengislána verður eytt

Í febrúar mun hæstiréttur úrskurða um vaxtaforsendur gengislána, það er hvort bankarnir geti áfram rukkað fólk aftur í tímann um vexti þótt það sé þegar búið að greiða þá. Um gríðarlega hagsmuni er að ræða fyrir skuldara.

Eins og alkunna er féllu dómar í hæstarétti um ólögmæti gengislána (mál nr. 92/2010 og 153/2010), þar sem lán sem tekin voru í íslenskum krónum en tengd erlendum gjaldmiðli voru dæmd ólögmæt samkvæmt reglum laga nr. 38/2001.

Í umfjöllun um þetta mál í viðskiptablaði Morgunblaðsins í dag segir, að ágreiningur sé  aftur á móti enn uppi um hvort þar með falli vaxtaútreikningur þessara lána niður eða ekki. Skuldarar hafa þegar greitt vexti af lánunum en þar sem um gengislán hafi verið að ræða voru þeir eðlilega lágir. Bankarnir hafa því rukkað aftur í tímann út frá töxtum Seðlabanka Íslands um vexti og krafist mun hærri greiðslna.

Mál Maríu Elviru Mendéz Pinedo, prófessors hjá Háskóla Íslands og sérfræðingi í Evrópurétti, verður flutt fyrir hæstarétti hinn 6. febrúar og eru sjö dómarar settir yfir málið. Þegar svo margmennur dómur er í málum er venjan að málsmeðferðin taki stuttan tíma, hugsanlega aðeins tvær til þrjár vikur.