Þrjú evruríki með verra mat en Ísland

Þrátt fyrir að matsfyrirtæki hafi lækkað lánshæfiseinkunnir margra evruríkja þá eru einungis þrjú evruríki af 17 með verra lánshæfismat en Ísland, þ.e. Grikkland, Portúgal og Kýpur. Þetta kemur fram í Morgunkorni Greiningardeildar Íslandsbanka í gær.

Þar kemur fram að Kýpur er með lægri lánshæfiseinkunn en Ísland hjá S&P en með sömu einkunn hjá Moody´s og Fitch, og er lánshæfismat þess þar með aðeins verra sé tekið mið af meðaltali.

Greining Íslandsbanka telur að áhugavert verði að fylgjast með framvindu mála á lánshæfismati evruríkja, enda séu lánshæfiseinkunnir þeirra meira og minna í neikvæðum horfum.