Möguleikar Grikkja meiri utan evrusvæðisins

Innanríkisráðherra Þýskalands, Hans-Peter Friedrich, telur að Grikkir eigi að yfirgefa evrusvæðið. Með því séu meiri möguleikar fyrir landið að verða samkeppnishæft á ný.

Þetta kemur fram í viðtali við ráðherrann í vikuritinu Der Spiegel í gær.

Hann segist hins vegar ekki vera fylgjandi því að Grikkir verði reknir úr evrusamstarfinu en skapa eigi þeim tækifæri til að yfirgefa evrusamstarfið með þeim hætti að þeir geti ekki hafnað boðinu.

Friedrich segist telja að möguleikar Grikkja séu mun meiri fyrir utan myntsamstarfið en innan þess.

Á morgun mun þýska þingið greiða atkvæði um frekari lánveitingar til handa gríska ríkinu.  Stefnt er að því að Evrópusambandið og Alþjóðagjaldeyrissjóðurinn láni Grikkjum 130 milljarða evra á næstu tveimur árum gegn því að Grikkir herði sultarólina enn frekar. Eins munu fjármálafyrirtæki afskrifa 107 milljarða evra af skuldum gríska ríkisins. Þjóðverjar leggja mest af mörkum í lánapakkanum til Grikkja.

• 4 blogg um fréttina

Bloggað um fréttina

• Páll Vilhjálmsson: Evran fær Grikki til að veðja gegn eigin þjóð
• Haraldur Haraldsson: Möguleikar Grikkja meiri utan evrusvæðisins/Þetta eigum við að lesa vel,og …
• Vinstrivaktin gegn ESB: Þjóðverjum finnst þeir vera að moka í botnlausa tunnu
• Bjarni Harðarson: Evran hentar ekki í jaðri Evrópu