Vantar íbúðir fyrir næstu árganga

Samkvæmt talningu hjá Samtökum iðnaðarins eru aðeins 545 íbúðir í fjölbýli á höfuðborgarsvæðinu fokheldar eða lengra komnar. Af þeim eru ekki nema 192 íbúðir íbúðarhæfar (á byggingarstigi 6 og 7) og hefur þeim fækkað um 292 á innan við ári. Telja samtökin þetta vera skýr skilaboð um að þörf sé á því að fara í frekari nýbyggingar til að forðast vöntun á húsnæði og mögulega þenslu til lengri tíma.

Í greinargerð sem fylgir talningunni kemur fram að stórir árgangar af ungu fólki séu á leiðinni og því þurfi að bregðast við þeim skorti sem gæti komið upp. „Miðað við fjölda íbúða og byggingarstig telja samtökin ótvírætt að þörf sé á íbúðum fyrir „fyrstu íbúða kaupendur“. Þ.e. smærri og ódýrari eignir, án bílakjallara svo dæmi sé tekið. Líta verður til þess að sala á húsnæði hefur verið dræm frá hruni og margir sem hafa haldið að sér höndum eru nú tilbúnir að kaupa, einnig eru stórir árgangar að koma nýir inn á markaðinn.“

Þegar hvert sveitarfélag er skoðað kemur í ljós að flestar íbúðir í fjölbýli eru í byggingu í Reykjavík og Hafnarfirði, en rúmlega 300 íbúðir eru í byggingu á hvorum stað. Í Reykjavík eru þó fleiri íbúðir komnar yfir fjórða byggingarstig og því taldar fokheldar, meðan fleiri íbúðir í Hafnarfirði eru á byggingarstigi 2 og 3. Í Kópavogi eru um 200 fjölbýlisíbúðir í byggingu, en í öðrum sveitarfélögum eru 121 fjölbýlisíbúðir í byggingu.

Nokkuð færri rað- og parhús eru í byggingu, en samtals eru 216 eignir í þessum flokki í byggingu, en stærstur hluti þeirra er kominn yfir byggingarstig 4. Flestar eignirnar er að finna í Reykjavík, Mosfellsbæ og Hafnarfirði. Rúmlega 100 einbýlishús eru í byggingu og eru þau flest í Kópavogi, en einnig er töluverður fjöldi í Garðabæ og Hafnarfirði.

Samtök iðnaðarins vara við að fjöldi nýbygginga sé of lítill og að mikil þörf sé á að fara út í meiri fjárfestingu til að verða við kröfu markaðarins um húsnæði. „Talið er að árlega þurfi um 1.500 nýjar íbúðir inn á markaðinn og eru íbúðir í byggingu því innan við áætlaða ársþörf. Þá þarf að hafa í huga að byggingartími íbúðar í fjölbýli er 18-24 mánuðir þannig að ljóst er að íbúðir í byggingu eru langt frá því að fullnægja þörf markaðarins.“

Mbl.is hefur áður fjallað um áhyggjur samtakanna af þróun byggingamarkaðarins og vilja borgaryfirvalda til að auka við nýbyggingar.

• Blogga um frétt