Grísk mynd á evruseðla

Sumum myndi þykja það prýðisgott dæmi um kaldhæðni að Seðlabanki Evrópu hefur ákveðið að táknmynd úr grískri goðafræði muni skipa veigamikinn sess í öryggisvörnum nýrra evruseðla.

Ásýnd goðsagnaprinsessunnar Evrópu verður notuð sem vatnsmerki á seðlunum frá og með næsta ári og kemur í stað vatnsmerkja sem sýna merkileg mannvirki í álfunni.

Bloomberg hefur þetta eftir nafnlausum heimildarmanni innan bankans, en ekki er enn búið að gera opinberar væntanlegar breytingar á seðlunum. Til stendur að kynna breytta hönnun evruseðla í nóvember og dreifa fyrstu eintökunum af endurbættum fimm evru seðlum í maí á næsta ári.