Viðskipti | mbl | 28.9.2012 | 16:10

Krónan gæti haldið áfram að veikjast

mbl.is

Upp úr miðju sumri tók krónan að styrkjast mikið og náði sínu sterkasta gildi í rúm þrjú ár þann 10. ágúst. Þessi styrking gekk hins vegar til baka með jafn kröftugum hætti og er krónan komin á svipaðar slóðir og hún var fyrir styrkinguna. Leitni krónunnar bendir til þess að hún geti haldið áfram að veikjast á næstunni. Þetta kemur fram í Vegvísi hagfræðideildar Landsbankans.

Helstu niðurstöður umfangsmikils rits Seðlabankans um valkosti Íslendinga í gjaldmiðils- og gengismálum eru að einu raunhæfu kostirnir í vali á framtíðargjaldmiðli landsins séu að halda krónunni eða taka upp evru í kjölfar inngöngu í ESB. Seðlabankinn segir að verði síðari kosturinn fyrir valinu sé samt mikilvægt að styrkja núverandi fyrirkomulag peningamálastjórnunar enda ljóst að upptaka evru verður ekki möguleg fyrr en að allmörgum árum liðnum.

Ársverðbólgan jókst lítillega í september eftir svo til samfellda lækkun frá því í maí. Aðhaldsstig peningastefnunnar m.v. raunstýrivexti breyttist því lítið milli mánaða. Á móti vegur að verðbólguhorfurnar hafa versnað töluvert í ljósi mikillar veikingar krónu frá síðustu vaxtaákvörðun.

Hagvöxtur á fyrri árshelmingi var undir væntingum og gæti vöxturinn yfir árið í heild orðið nokkuð lægri en spáð hafði verið. Hagstofan hefur endurskoðað hagvöxt síðasta árs til lækkunar og gerir ráð fyrir að hann hafi verið 2,6% í stað 3,1% áður. Atvinnuleysið hefur minnkað hraðar en vænst hafði verið og eru líkur á því að verði minna á árinu en spáð var í lok síðasta árs, segir í Vegvísinum.

Þar segir ennfremur að markaðsaðilar séu svartsýnni á hagvaxtarþróun á evrusvæðinu og Bretlandi en þeir voru í lok síðasta árs en séu aftur á móti bjartsýnni um þróunina í Bandaríkjunum og Japan. Nýjustu aðgerðir seðlabanka Bandaríkjanna, QE3, gefa til kynna að hann leggi mikla áherslu á að rétta við efnahaginn í Bandaríkjunum. Þannig hefur Seðlabankinn lofað að standa að uppkaupum á eignavörðum skuldabréfum þar til vinnumarkaðurinn er kominn í samt lag.

Úrvalsvísitalan hefur hækkað 3 vikur í röð og gæti það bent til þess að markaðurinn muni leita upp á við á ný eftir niðurhallandi þróun frá því í maíbyrjun. Allt er með kyrrum kjörum á fasteignamarkaði og má gera ráð fyrir að svo verði áfram. Heildarúthlutun veiðiheimilda fyrir næsta fiskveiðiár nemur 318 þúsund tonnum samanborið við 300 þúsund tonn á fyrra ári. Helsti munurinn felst í aukinni úthlutun á þorski upp á 23 þúsund tonn. Gera má ráð fyrir að sú aukning skili rúmum 19 milljörðum kr. í auknar gjaldeyristekjur, segir í Vegvísi hagfræðideildar Landsbankans.