Hæstu launin í sjávarútvegi

Meðallaun starfsmanna hjá Stálskipum á síðasta ári voru 23 milljónir króna en alls starfa 30 hjá fyrirtækinu. Hjá Eskju eru starfsmennirnir 89 talsins og meðallaunin á síðasta ári 19,8 milljónir króna.

Meðallaun hjá Brimi voru 17,5 milljónir króna á síðasta ári en alls starfa 228 hjá fyrirtækinu. Er það 57% hækkun frá árinu 2010, samkvæmt nýjum lista Frjálsrar verslunar um 300 stærstu fyrirtækin.

Í næstu sex sætum varðandi hæstu meðallaunin hjá fyrirtækjum eru fjármálafyrirtæki. Arev verðbréfafyrirtæki greiðir starfsfólki sínu að meðaltali 15,5 milljónir króna í árslaun, Eyrir Invest er með 15.250 þúsund krónur í meðalárslaun og Júpiter með 14,3 milljónir króna. Næst í röðinni er Stefnir með 13,8 milljónir króna, Saga Capital með 12 milljónir rúmar og Auður Capital með 11,7 milljónir króna í meðallaun starfsmanna á síðasta ári.

Norðurál hagnaðist mest

Samkvæmt Frjálsri verslun er Bakkavör stærsta fyrirtækið árið 2011 líkt og 2010 og Actavis er í öðru sæti listans líkt og árið 2010.

Mesti hagnaðurinn er hjá Norðurál Grundartanga eða 11,5 milljarðar króna í hagnað fyrir skatta en eftir skatta er hagnaðurinn 9,5 milljarðar króna.

Í öðru sæti er Samherji með 11 milljarða í hagnað fyrir skatta en 8,8 milljarða króna hagnað eftir skatta.

• 1 blogg um fréttina

Bloggað um fréttina

• Ólafur Örn Jónsson: Áróðurinn beinist nú gegn eigin fólki og Hafnarfjarðar Gunna fer …