Telur að breytt fjármálakerfi gæti leitt til glataðra efnahagslegra tækifæra

Með því að gera þá grundvallarbreytingu á fjármálakerfinu að afnema heimildir innlánsstofnana til útlána umfram lausar bankainnstæður er hætt við því að margt glatist af þeim efnahagslegum tækifærum sem nú eru í boði fyrir tilstilli fjármálastofnanna.

Þetta kemur fram í umsögn Seðlabanka Íslands til efnahags- og viðskiptanefndar um tillögu Lilju Mósesdóttur um að fela sérfræðinganefnd að skoða leiðir til að aðskilja peningamyndun og útlánastarfsemi.

Í fréttaskýringu um þessi mál í viðskiptablaði Morgunblaðsins í dag kemur fram, að í umsögn Seðlabankans sé bent á það, að fjármálastofnanir sérhæfi sig í að takast á við grundvallarvandamál tengd útlánastarfsemi; ósamhverfum upplýsingum og kostnaðarsömu eftirliti með lántökum.

Samtökin Betra peningakerfi, undir forystu Frosta Sigurjónssonar, fjárfestis og þingmannsefni Framsóknarflokksins, telja hins vegar að gríðarmikið sé áunnið með slíkum aðskilnaði.