Viðskipti | mbl | 8.1.2013 | 11:37 | Uppfært 16:36

Aldrei fleiri án vinnu á evrusvæðinu

Emmanuelle Baillon er ein þeirra Grikkja sem eru án vinnu. Maður hennar er einnig atvinnulaus, en hann reynir að skapa sé vinnu með því að búa til minjagripi og selja þá ferðamönnum. LOUISA GOULIAMAKI

Atvinnuleysi á evrusvæðinu í nóvember var 11,8% og hefur aldrei mælst meira. Atvinnuleysi meðal ungs fólks mældist 24,4%.

Þetta kemur fram í tölum sem Eurostat, hagstofa Evrópusambandsins, birti í dag. Atvinnuleysi á evrusvæðinu jókst um 1 prósentustig frá október. Samkvæmt tölunum hefur atvinnuleysi í Evrópusambandinu öllu ekkert breyst, en það er 10,7%.

Atvinnuleysið er mest á Spáni 26,9%. Þar á eftir kemur Grikkland með 20% atvinnuleysi. Minnsta atvinnuleysið er í Austurríki 4,5%. Mest dró úr atvinnuleysi í nóvember í Eistlandi eða úr 12,1% í 9,5%, en Eistland er nýjasta landið sem tók um evru. Um 26 milljónir manna eru án vinnu í ESB, þar af 18,8 milljónir á evrusvæðinu.

24,4% ungs fólks á evrusvæðinu eru án vinnu, en hlutfallið er 23,7% í Evrópusambandinu öllu.

Jose Manuel Barroso, forseti framkvæmdastjórnar ESB, sagði eftir að tölurnar voru birtar að hann teldi að það versta væri yfirstaðið og atvinnuleysi innan ESB myndi fara minnkandi.