Fjárfesting á Íslandi langt undir meðaltali evruríkja

Aðeins þrjú ríki á evrusvæðinu – Grikkland, Írland og Kýpur – voru með lægra fjárfestingastig en Ísland á árinu 2012.

Miðað við áætlaðar hagtölur fyrir síðasta ár þá verður heildarfjármunamyndun í íslenska hagkerfinu 14,9% sem hlutfall af vergri landsframleiðslu. Það er tæpum fjórum prósentum lægra en að meðaltali hjá þeim 17 ríkjum sem eru í evrópska myntbandalaginu.

Í fréttaskýringu í Morgunblaðinu í dag um þessi mál segir Orri Hauksson, framkvæmdastjóri Samtaka iðnarins, að það sé umhugsunarefni hversu hægt hefur miðað í þá átt að ná fjárfestingu í það sem mætti kalla eðlilegt horf eftir hrun bankakerfisins árið 2008. „Við náðum botninum mun fyrr en evruríkin og því mætti ætla að fjárfesting væri meiri hérlendis en að meðaltali á evrópska myntsvæðinu.“