Leitað að stjórnarmönnum í banka

Bankasýsla ríkisins leitar að aðilum, sem tilbúnir eru að bjóða sig fram í stjórnir fjármálafyrirtækja, sem stofnunin fer með eignarhluti í. Fjármálastofnanirnar sem um ræðir eru stóru viðskiptabankarnir þrír auk fimm sparisjóða. Þetta kemur fram í tilkynningu frá stofnuninni.

Bankasýsla ríkisins er sérstök ríkisstofnun, sem stofnuð var með lögum nr. 88/2009, og fer með eignarhluti ríkisins í þremur viðskiptabönkum (Arion banka hf., Íslandsbanka hf. og Landsbankanum hf.) og fimm sparisjóðum (Sparisjóði Bolungarvíkur, Sparisjóði Norðfjarðar, Sparisjóði Svarfdæla, Sparisjóði Þórshafnar og nágrennis og Sparisjóði Vestmannaeyja).

Sérstök þriggja manna valnefnd, sem skipuð er af stjórn Bankasýslu ríkisins, tilnefnir aðila fyrir hönd ríkisins sem rétt hafa til setu fyrir hönd þess í bankaráðum eða stjórnum fyrirtækja á forræði stofnunarinnar. Stjórn Bankasýslu ríkisins óskar formlega eftir tilnefningum valnefndar um stjórnarmenn fyrir stjórnarkjör í hlutaðeigandi bankaráðum eða stjórnum.

Nánari upplýsingar má finna á heimasíðu Bankasýslunnar

• 1 blogg um fréttina

Bloggað um fréttina

• Jóhann Kristinsson: Jóhönnu og Steingríms klíkan kemur sínum mönnum inn 1/2 fyrir …