Spá óbreyttum stýrivöxtum

Greining Íslandsbanka spáir því að Seðlabankinn haldi stýrivöxtum sínum óbreyttum við næstu vaxtaákvörðun sem er 20. mars. Þetta kemur fram í Morgunkorni Íslandsbanka.

Meginforsenda spárinnar er að krónan hefur styrkst talsvert undanfarið og hagvöxtur undanfarið hefur verið öllu hægari en Seðlabankinn hafði reiknað með í sinni nýjustu spá. Verðbólguhorfur hafa því batnað nokkuð frá síðustu vaxtaákvörðun.

Á móti vegur að verðbólgan hefur aukist nokkuð frá síðustu vaxtaákvörðun og verður verðbólga væntanlega nokkuð yfir spá Seðlabankans fyrir fjórðunginn. Þá er verðbólguspá Seðlabankans nokkuð bjartsýn varðandi hversu hratt bankinn reiknar með hjöðnun verðbólgunnar á næstu mánuðum, segir í Morgunkorninu. Þar kemur ennfremur fram að reiknað sé með því að verðbólgan hjaðni, en hægar en Seðlabankinn spáir.

Gengi krónunnar hefur hækkað um 3,3% frá síðasta vaxtaákvörðunarfundi 6. febrúar síðastliðinn.

• 1 blogg um fréttina

Bloggað um fréttina

• Magnús Helgi Björgvinsson: Hlustið ekki á andstæðinga ESB viðræðna.