Viðskipti | mbl | 7.4.2013 | 12:30

Hrunið bjargaði slippnum

Slippurinn í Reykjavík hefur fengið nýjan svip með opnun Icelandair Hótel Reykjavík Marina. Ómar Óskarsson

Veiking krónunnar í kjölfar efnahagshrunsins gerði það að verkum að allt í einu urðu skipaviðgerðir samkeppnishæfar hér á landi og í nokkur ár voru allar stórar viðgerðir gerðar hér á landi, auk þess sem erlend skipafélög sóttu í þjónustu hér á landi. Þá hafi hrunið stoppað þau áform sem uppi voru hjá borgaryfirvöldum um flutning slippsins frá gömlu höfninni til Grundartanga og ný borgarstjórn vilji nú halda slippnum og starfsemi hans í miðbænum. Þetta segir Bjarni Thoroddsen, framkvæmdastjóri Stálsmiðjunnar Frumtaks, í samtali við mbl.is

„Það er eiginlega of mikið að gera eins og staðan er í dag,“ segir Bjarni, en hann er þó ekki alveg jafn bjartsýnn á framtíðina og segir að mörg stærri verkefna hér á landi séu í biðstöðu eða óvíst hvort af verði. Nefnir hann þar á meðal virkjanaframkvæmdir og vinnslu við álver.

Halda upp á 80 ára afmælið

Fyrirtækið Stálsmiðjan rekur uppruna sinn til ársins 1933 og verður því 80 ára á þessu ári. Auk þess að reka slippinn er fyrirtækið með stálsmiðju á Grundartanga og vélaviðgerðir, stálsmiðju og renniverkstæði undir nafni Framtaks í Garðabæ. Þá flutti dísilverkstæði félagsins, sem kallast Blossi, nýlega upp á Dvergshöfða, en Blossi hafði áður verið í Garðabæ. Á sama stað flutti einnig trésmíðahluti fyrirtækisins sem áður var með aðsetur úti á Granda.

Komið að flestum virkjunum hérlendis

Stálsmiðjan hefur að sögn Bjarna verið mjög tengd öllum virkjanaframkvæmdum hér á landi gegnum tíðina og komið að vélbúnaði í þeim öllum, ef frá er talin Blönduvirkjun. Þá hafi félagið komið að byggingu allra álveranna og sé í dag að þjónusta þau, meðal annars með viðhaldi á kerum.

Eftir efnahagshrunið breyttist nokkuð áhugi manna á skipaviðgerðum hérlendis og segir Bjarni að allt í einu hafi fyrirtækið orðið samkeppnishæft á alþjóðamarkaði vegna gengislækkunar krónunnar. „Eftir hrunið verðum við samkeppnishæf og jafnvel ódýrari en verkstæði í Póllandi,“ en hann segir að það hafi verið óhugsandi fyrir hrunið. Þá hafi jafnvel skipafyrirtæki sent skip í viðgerð hingað frá Noregi, Kanada og Grænlandi.

Slippurinn ekki lengur þyrnir í augum yfirvalda

Mikil uppbygging hefur verið í kringum slippsvæðið á síðustu árum og nú er þar komið nýtt Icelandair hótel, auk þess sem fjöldi veitingastaða og annarrar verslunar hefur sprottið þar upp. Aðspurður hvort ekki hafi þrengt að svæðinu og hvort hann telji að mögulegt fyrir slippinn að vera mikið lengur í gömlu höfninni segir Bjarni að mikil umskipti hafi orðið hjá borgaryfirvöldum.

„Það er mikill vilji borgaryfirvalda að halda slippstarfseminni áfram. Þetta hefur aðdráttarafl fyrir ferðamenn og mér skilst að það sé orðið einstakt að svona starfsemi sé í miðri borg. En þetta virðist hafa slegið í gegn og mér skilst að það veki athygli gesta hótelsins að sjá skip dregin upp,“ segir Bjarni, en að sögn hans var ekki vilji hjá fyrri stjórnvöldum að halda starfseminni og byrjað var að huga að niðurrifi og brottflutningi fyrirtækisins af svæðinu. Vegna þessa hafði verið tekin frá lóð upp á Grundartanga fyrir slippinn og útilokar Bjarni ekki að þangað fari hann í framtíðinni.

Framtíðin ekki nógu björt

Miðað við stöðu mála í dag virðist því hagur starfseminnar vera nokkuð góður, en Bjarni segir að framtíðin sé ekki nógu björt. Hann nefnir í því samhengi að nokkur stórverkefni séu í biðstöðu eða óvissu. Meðal annars Helguvík, Hverahlíðavirkjun og vatnsaflsvirkjanir. Ef að ekkert af þessum verkefnum verður segir hann að tala megi um að starfsemin verði í herkví, en verði farið út í einhver þeirra sé bjart yfir.