Skoða uppbyggingu hátækniseturs hérlendis

Lyfjafyrirtækið Alvogen undirbýr nú byggingu Hátækniseturs sem mun hýsa alþjóðlegar skrifstofur Alvogen og þróun- og framleiðslu líftæknilyfja. Til skoðunar er meðal annars að starfsemin verði innan Vísindagarða Háskóla Íslands í Vatnsmýrinni. Fyrirhugað er að Hátæknisetrið muni hýsa um 200 starfsmenn félagsins á næstu árum. Gert er ráð fyrir að fyrstu líftæknilyf Alvogen verði markaðssett árið 2019. Þetta kemur fram í tilkynningu frá félaginu.

Dr. Fjalar Kristjánsson, framkvæmdastjóri Gæðasviðs Alvogen mun stýra hönnun og uppbyggingu Hátæknisetursins, sem meðal annars hefur verið unnin í samstarfi við íslensk fyrirtæki. Fjalar hefur áratuga reynslu af lyfjageiranum og hefur verið lykilstjórnandi hjá Alvogen, Actavis og Delta um langt skeið.

„Alvogen hyggst vera í hópi fyrstu samheitalyfjafyrirtækja sem markaðssetja lyfin á heimsvísu. Fá alþjóðleg samheitalyfjafyrirtæki hafa haslað sér völl í eigin þróun og framleiðslu líftæknilyfja eins og Alvogen hyggst gera. Við sjáum því mikil tækifæri á sviði líftæknilyfja og munum fljótlega taka ákvörðun um staðsetningu starfseminnar. Áhugavert væri að byggja upp slíka starfsemi á Íslandi og fýsileikakönnun á þeim valkosti er nú langt komin“, segir Fjalar. 

Ísland og Malta eru ákjósanlegir staðir fyrir lyfjaþróun segir í tilkynningunni. Þá gerir einkaleyfaumhverfi þessara landa fyrirtækjum kleift að hefja þróun og framleiðslu lyfja áður en einkaleyfi þeirra renna út. Þetta skapar ákveðið samkeppnisforskot fyrir Alvogen. Undanfarna mánuði hefur Alvogen lagt mat á ákjósanlega staðsetningu fyrir starfsemina og mun ákvörðun liggja fyrir á næstu vikum.

Meðal stjórnenda hjá Alvogen eru Robert Wessman og Svafa Grönfeldt. Róbert er þar forstjóri og stjórnarformaður en Svafa er þróunarstjóri.

• 1 blogg um fréttina

Bloggað um fréttina

• Arnar Pálsson: Tækni - lyf - heilbrigði - mýrin