Frostkaldar nætur í efnahagslífinu

Ríkisstjórn Svíþjóðar hefur lækkað hagvaxtarspá sína fyrir næsta ár vegna efnahagsástandsins í heiminum en áhrif kreppunnar hafa reynst meiri á Svíþjóð en áður var talið, að sögn fjármálaráðherra Svíþjóðar Anders Borg. Varar hann við frostköldum nóttum í efnahagslífi landsins.

Spáir fjármálaráðuneytið 2,2% hagvexti á næsta ári en fyrri spá ráðuneytisins hljóðaði upp á 3% hagvöxt á næsta ári. Í ár er spáð 1,2% hagvexti í Svíþjóð en fyrri spá hljóðaði upp á 1,1% hagvöxt. Árið 2015 er hins vegar spáð 3,6% hagvexti sem er í samræmi við fyrri spá.

„Það er mikill mótvindur frá efnahagskerfi heimsins sem hamlar batanum í Svíþjóð,“ sagði Borg á fundi með blaðamönnum í morgun.

Í ár er spáð 8,3% atvinnuleysi í Svíþjóð, 8,4% á næsta ári en 8,1% árið 2015. Í febrúar mældist atvinnuleysið 8,2% í Svíþjóð.

Erica Blomgren, sérfræðingur hjá SEB bankanum, segir að spá fjármálaráðuneytisins frá því í haust hafi verið allt of bjartsýn og að nýja spáin sé meira í takt við raunveruleikann.

Stefan Löfven, leiðtogi sænska Jafnaðarmannaflokksins, hét því í ræðu á föstudag að ef flokkurinn hefði betur í þingkosningunum í september 2014 þá yrði það eitt helsta markmiðið að ná atvinnuleysi niður í 4,7% árið 2020. Hann segir að hægri stjórninni hafi mistekist í baráttunni gegn atvinnuleysi en atvinnuleysi er meira í Svíþjóð heldur en í mörgum þeim löndum sem Svíþjóð ber sig saman við. Nefndi hann lönd eins og Austurríki, Belgíu, Finnland og Holland.

Sjá nánar hér

• 1 blogg um fréttina

Bloggað um fréttina

• Heimssýn: Evrukreppan hægir á hagvexti í Svíþjóð