Sala Vodafone vekur spurningar

Fjárfestum og verðbréfamiðlurum sem Morgunblaðið hefur rætt við þykir afar óheppilegt að Framtakssjóður Íslands hafi selt 19,4% hlut í Vodafone þann 2. apríl sl., fyrsta viðskiptadag eftir að fyrsta ársfjórðungi lauk.

Á fimmtudaginn birti Vodafone ársfjórðungsuppgjör sem var undir væntingum og lækkuðu bréfin um 7,6%. Bréfin lækkuðu um 4,3% í gær, að því er fram kemur í umfjöllun um mál þetta í Morgunblaðinu í dag.

Þór Hauksson, starfsmaður Framtakssjóðsins var stjórnarformaður Vodafone, þegar salan fór fram. Þetta vekur spurningar um hve mikið sjóðurinn vissi um rekstur Vodafone, segja viðmælendur blaðsins. Eftir söluna átti sjóðurinn ekkert í fjarskiptafélaginu og vék Þór úr stjórn á aðalfundi sem var 11. apríl.