Ísland heldur stöðu sinni

Lánshæfiseinkunn Íslands hjá alþjóðlega matsfyrirtækinu Moody's er óbreytt, Baa3, í nýrri skýrslu um Ísland. Fyrirtækið segir ýmislegt á batavegi í íslensku efnahagslífi en skuldastaða ríkissjóðs sé erfið og ekki bæti gjaldeyrishöftin úr skák.

í árlegri skýrslu Moody's um Ísland kemur fram að einkunnin Baa3 endurspegli vel stöðu Íslands. Efnahagslífið sé á batavegi eftir efnahagskreppuna og skammtímahorfur góðar þrátt fyrir að dregið hafi úr hagvexti á síðasta ári.

Hvað varðar horfur til lengri tíma skipti miklu máli hversu miklar fjárfestingar verða og þar sé veigamesti þátturinn hvenær og hvernig gjaldeyrishöftum verði aflétt.

Góður árangur á árunum eftir hrun

Ríkisstjórn Íslands hafi komið efnahagslífinu, fjármálakerfinu og fjármálum hins opinbera á rétta leið  og mikilvægar breytingar hafi verið gerðar á stofnunum ríkisins og bankakerfinu svo hægt sé að forða landinu frá öðru hruni.

Moody's telur fjárhagslegan styrk íslenskan ríkisins lítinn einkum vegna mikilla skulda hins opinbera. Á sama tíma hafi stjórnvöldum tekist að lækka skuldir hins opinbera verulega frá árinu 2008 og á síðasta ári hafi í fyrsta skipti frá hruni dregið úr skuldum hins opinbera.

Horfur á næstu árum byggi á því hvernig ríkisstjórninni takist til við að tryggja fjárhagslega stöðu ríkisins og að draga áfram úr skuldasöfnun hins opinbera.

Skýrslan í heild

Fréttatilkynning frá Moody's

• 1 blogg um fréttina

Bloggað um fréttina

• Óskar: Enn er Jóhönnustjórninni hrósað