Samherji kaupir línuveiðiskip frá Noregi

Nú í vikunni gekk Samherji frá kaupum á Carisma Star, 52 metra löngu og 11 metra breiðu línuveiðiskipi. Carisma Star var áður í eigu Carisma Star AS í Måløy, Noregi og var smíðað í Noregi árið 2001. Það fór í gagngera yfirhalningu árið 2008 þar sem vinnsludekkið var meðal annars endurbyggt og vistarverur endurbættar.

Skipið er mjög vel með farið, samkvæmt upplýsingum frá Samherja og vel útbúið til línuveiða, en skipið er með brunn í miðju skipinu, fremst í vélarrúmi þar sem línan er dregin í gegnum, en fá skip í heiminum eru þannig útbúin.

Samherji hyggst gera skipið út á bolfisk á Íslandi á næstu mánuðum og mun skipið landa ferskum afla til vinnslu í landvinnslunum á Dalvík og Akureyri. Skipið er vel útbúið til vinnslu um borð, bæði fyrir flökun og heilfrystingu.

Skipið er komið úr sinni síðustu veiðiferð í Noregi og landar á mánudaginn og fer síðan í slipp og verður í framhaldi af því afhent nýjum eigendum.

Kaupverð er ekki gefið upp.