Viðskipti | mbl | 30.9.2013 | 9:09 | Uppfært 9:32

Vöruskiptajöfnuðurinn lakari í ár

Samdráttur í útflutningi á iðnaðarvörum og sjávarafurðum er að hluta til vegna verðlækkana á afurðaverði. mbl.is/Rax

Fyrstu átta mánuðina voru fluttar út vörur fyrir 393,8 milljarða króna en inn fyrir 362,6 milljarða króna. Afgangur var því á vöruskiptum við útlönd sem nam 31,1 milljarði króna en á sama tíma árið áður voru þau hagstæð um 40,2 milljarða. Vöruskiptajöfnuðurinn var því 9,1 milljarði króna lakari en á sama tíma árið áður.

Í ágústmánuði voru fluttar út vörur fyrir 44,1 milljarð króna og inn fyrir 41,2 milljarða króna fob (44,4 milljarða króna cif). Vöruskiptin í ágúst, reiknuð á fob verðmæti, voru því hagstæð um 2,9 milljarða króna. Í ágúst 2012 voru vöruskiptin hagstæð um 13,8 þúsund milljónir króna á gengi hvors árs, samkvæmt frétt á vef Hagstofu Íslands.

Minna fæst fyrir iðnaðarvörur og sjávarafurðir á erlendum mörkuðum

Fyrstu átta mánuði ársins 2013 var verðmæti vöruútflutnings 20,7 milljörðum eða 5% minna á gengi hvors árs en á sama tíma árið áður. Iðnaðarvörur voru 52,1% alls útflutnings og var útflutningur þeirra 6,9% minni en á sama tíma árið áður. Sjávarafurðir voru 44,1% alls útflutnings og var verðmæti þeirra 1,3% minna en á sama tíma árið áður. Samdráttur í útflutningi á iðnaðarvörum og sjávarafurðum er að hluta til vegna verðlækkana á afurðaverði.

Fyrstu átta mánuði ársins 2013 var verðmæti vöruinnflutnings 11,6 milljörðum eða 3,1% minna á gengi hvors árs en á sama tíma árið áður, aðallega vegna minni innflutnings á skipum og flugvélum. Einnig minnkaði innflutningur á eldsneyti en á móti kom aukinn innflutningur fjárfestingavara, hrávara og rekstrarvara.