Frakkland veiki hlekkur evrusvæðisins

Lækkun matsfyrirtækisins Standard og Poor's á lánshæfiseinkunn Frakklands í dag er ekki aðeins áfall fyrir ríkisstjórn Francois Hollande, forseta landsins, heldur skapar hún óvissu um mögulegan viðsnúning evrusvæðisins sem þótti viðkvæmur fyrir. Einkunnin var lækkuð úr AA+ í AA.

Fram kemur í frétt AFP að lækkunin sé enn ein vísbendingin um þá djúpu efnahagslegu, pólitísku og stofnanalegu spennu sem til staðar er í Frakklandi sem er næststærsta hagkerfi evrusvæðisins á eftir Þýskalandi. Haft er eftir greinendum að Frakkland sé nú veiki hlekkurinn á evrusvæðinu þar sem erfiðlega gangi að koma efnahagsmálum landsins í betri farveg.

„Við sjáum ekki neina heildaráætlun um að endurskoða opinber útgjöld og stuðla þannig að mögulegum hagvexti,“ segir Jean-Michel Six, hagfræðingur hjá S&P, í samtali við AFP. Jafnvel þó slík áætlun væri fyrir hendi myndi hún að í besta falli skila mjög litlum hagvexti.

Fram kemur í greiningu S&P að miklar skuldir, háir skattar og atvinnuleysi drægju úr svigrúmi stjórnvalda til þess að taka á vandanum. Brýnt væri að grípa til meiri umbóta í stjórnsýslunni og auka hagkvæmni hennar.

Francois Hollande forseti Frakklands. AFP

• 1 blogg um fréttina

Bloggað um fréttina

• Heimssýn: Evrufræði - lexía númer tvö