Skatturinn brot á eignarrétti

Áformaður bankaskattur á fjármálastofnanir í slitameðferð, sem kynntur var í fjárlagafrumvarpi ríkisstjórnarinnar, er brot á eignarréttarákvæði í stjórnarskránni, brýtur jafnréttissjónarmið og er óréttlátur og órökréttur. Þetta segir slitastjórn Kaupþings banka í yfirlýsingu sem var birt á heimasíðu slitastjórnarinnar.

Þegar fjárlagafrumvarpið var kynnt 1. október síðastliðinn var ákveðið að hækka sérstakan bankaskatt og að stefna að því fella út undanþágu sem hafði verið í gildi varðandi fjármálastofnanir í slitameðferð. Áætlað var að þessar aðgerðir myndu skila 11,3 milljörðum í nýjar tekjur fyrir ríkissjóð, en stærstur hluti þeirra átti að koma frá þeim bönkum sem eru í slitameðferð.

Í tilkynningunni kemur fram að hlutverk slitastjórna sé ekki að veita útlán, en skatturinn er einmitt hlutfall af heildarskuldum fjármálastofnana. Því sé ekki réttlátt að þær fjármálastofnanir sem eru í slitameðferð greiði skattinn. Segir einnig að slitastjórnirnar hafi minni ráðrúm til að mæta skattlagningunni en aðrar fjármálastofnanir og því líti slitastjórnin svo á að um sé að ræða brot á jafnréttisákvæði sem er að finna í 65. grein stjórnarskráarinnar.

Slitastjórnin telur einnig að skattlagningin geti brotið eignarréttarákvæði stjórnarskráarinnar þar sem ekki sé tekið mið af innkomu eða möguleikum slitastjórnarinnar til að greiða skattinn. Því sé um eignaupptöku að ræða.

• 2 blogg um fréttina

Bloggað um fréttina

• Geir Ágústsson: Segir hver?
• Egill Jón Kristjánsson: Frelsi og helsi.