Tæpur þriðjungur Ítala við fátæktarmörk

Efnahagserfiðleikar Ítalíu hafa dregið úr kaupmætti um 69% ítalskra heimila og neytt vaxandi fjölda ungs fólks til þess að yfirgefa landið. Þetta er á meðal niðurstaðna rannsóknar ítölsku rannsóknarstofnunarinnar Censis sem birtar voru í dag. Rannsóknin náði til 1.200 ítalskra fjölskyldna um allt landið.

Meðal þess sem kemur fram í niðurstöðunum er að 53% aðspurðra hafi dregið úr bifreiða- og vespunotkun til þess að spara eldsneyti, 68% hafi dregið úr ferðum í kvikmyndahús og á aðrar skemmtanir og 45% sögðust hafa dregið úr ferðum á veitingahús og aðra matsölustaði. „Lok ársins 2013 eru mörkuð vaxandi óvissu um framtíð fólks á vinnumarkaði,“ segir ennfremur í niðurstöðunum. Tekjur fólks í suðurhluta landsins séu einkum minni og lægri að meðaltali miðað við höfðatölu en á Spáni og í Grikklandi.

Fram kemur á fréttavefnum Thelocal.it að hagstofa Evrópusambandsins hafi í gær upplýst að 29,9% Ítala séu við fátæktarmörk. Einungis Grikkir séu í verri stöðu af þeim ríkjum sem tilheyra evrusvæðinu.

• 2 blogg um fréttina

Bloggað um fréttina

• Kristbjörn Árnason: Fátækt afleiðing óstjórnar og vondra viðhorfa.
• Páll Vilhjálmsson: Evran markar endalok Evrópusambandsins