Bankaskattur bitni mest á konum

Friðbert Traustason, formaður Samtaka starfsmanna fjármálafyrirtækja (SSF), segir að auknar álögur á fjármálafyrirtæki hafi bitnað með verulegum hætti á starfsmönnum fjármálafyrirtækja og fjölskyldum þeirra undanfarin ár. Þær komi mest niður á konum, sem eru um 70% af öllum starfsmönnum fjármálafyrirtækja.

Í grein í nýjasta tölublaði SSF segir Friðbert að ef áætlanir ríkisstjórnarinnar gangi eftir verði heildarskattar og gjöld íslenskra fjármálafyrirtækja hærri en greidd laun þessara sömu fyrirtækja á næsta ári. Engin önnur starfsstétt þurfi að búa við sambærileg starfsskilyrði.

Hann segir að þeir alþingismenn sem samþykktu aukna skattheimtu á fjármálafyrirtæki hafi ekki vitað að lengst af hafi konur skipað um og yfir 70% starfa við fjármálafyrirtækin. „Það er hreint með ólíkindum að þurfa að lesa og upplifa slíkan fjandskap gagnvart einni tiltekinni starfsstétt, alveg sérstaklega frá löggjafanum sem talar á hátíðarstundum um að efla og fjölga störfum kvenna,“ segir Friðbert jafnframt.

• 1 blogg um fréttina

Bloggað um fréttina

• Páll Vilhjálmsson: Bankar: konur skjöldur gegn greiðslu skatta