Landsbankinn hagnast um 29 milljarða

Hagnaður Landsbankans nam 28,8 milljörðum króna eftir skatta á árinu 2013 samanborið við 25,5 milljarða króna á árinu 2012. Aukningin skýrist einkum af hærri þjónustutekjum, virðisbreytingum lána og hlutabréfa auk lækkunar á kostnaði. Þetta kemur fram í tilkynningu frá bankanum.

Haft er eftir Steinþóri Pálssyni bankastjóra að afkoman sýni traustan rekstur á öllum sviðum. „Tekjur bankans fara hækkandi og á sama tíma hefur verið dregið verulega úr rekstrarkostnaði. Arðsemi eigin fjár er ágæt þrátt fyrir hátt eiginfjárhlutfall. Vegna traustrar lausafjárstöðu í erlendri mynt greiddi bankinn annað árið í röð stóra fjárhæð inn á skuld sína við LBI hf. Þá greiddi Landsbankinn um 10 milljarða króna í arð á árinu og bankaráð hefur samþykkt að leggja til við aðalfund bankans að greiddur verði 20 milljarða króna arður vegna reksturs ársins 2013.“

Skattar á Landsbankann hækka um 8,2 milljarða

Reiknaðir skattar Landsbankans hækka um 8,2 milljarða króna miðað við árið á undan og nema nú 12,3 milljörðum. Steinþór segir augljóst að svo þungir skattar kunni að hafa áhrif á kjör til viðskiptavina til lengri tíma.

Arðsemi eigin fjár eftir skatta hækkar lítillega, þrátt fyrir hækkun eiginfjár. Arðsemin var 12,4% árið 2013 samanborið við 12,0% árið 2012. Hreinar vaxtatekjur námu 34,3 milljörðum króna á árinu 2013 en árið 2012 námu þær 35,6 milljörðum króna. Vaxtamunur í hlutfalli af meðalstöðu heildareigna lækkar lítillega, var 3,1% á árinu 2013 en 3,2% árið 2012.

Hreinar þjónustutekjur námu 5,3 milljörðum króna og hafa aukist um rúmlega 800 milljónir frá því árið áður, eða um 19%. Að teknu tilliti til verðbólgu hefur raunlækkun rekstrarkostnaðar milli ára verið 10,1%. Markmið bankans fyrir árið 2013 var að lækka  rekstrarkostnað bankans um 5%.

Laun lækka um 4%

Laun og tengd gjöld lækka um 4% milli ára, en sú lækkun er að frádreginni gjaldfærslu launa vegna móttöku hlutabréfa frá LBI hf. þar sem sama fjárhæð er einnig færð til tekna í bókhaldi bankans. Rekstrarkostnaður að frátöldum launum og launatengdum gjöldum lækkar um 9%. Stöðugildi í lok árs voru 1.183 og fækkaði um 50 á árinu.

Eigið fé bankans nam í lok árs 2013 um 241,4 milljörðum króna. Það hefur hækkað um 7% frá áramótum 2012 þrátt fyrir 10 milljarða króna arðgreiðslu á árinu. Eiginfjárhlutfall bankans (CAR – Capital Adequacy Ratio) er vel umfram kröfur Fjármálaeftirlitsins. Það var 26,7% í lok árs 2013 en 25,1% í lok árs 2012.

Eignir aukast um 6% milli ára

Heildareignir bankans námu 1.152 milljörðum í lok árs 2013. Aukningin er um 6% milli  ára og skýrist helst af auknum lausafjáreignum. Bankinn hefur lánað  rúma 143 milljarða króna  í ný útlán á árinu en vegna afborgana og styrkingar krónunnar og þar með lækkunar erlendra lána aukast heildarútlán um samtals 14 milljarða króna. Innlán viðskiptavina án fjármálafyrirtækja jukust um 8,5% á árinu eða um 35,6 milljarða.

Heildarvanskil hjá fyrirtækjum og heimilum stóðu í 5,3% í lok árs 2013, en voru 8,3% á sama tíma árið áður.

• 1 blogg um fréttina

Bloggað um fréttina

• Egill Jón Kristjánsson: Bankasaga, glæpurinn.