Hagvöxturinn gæti ýtt undir hærri vexti

Hagvöxtur mældist 3,3% á árinu 2013 samkvæmt bráðabirgðatölum sem Hagstofa Íslands birti nú í  morgun. Er þetta nokkuð umfram það sem flestir aðilar spáðu, þ.m.t. Seðlabanki Íslands sem reiknaði með hagvexti upp á 3,0% á árinu. Þá er þetta mesti hagvöxtur sem hefur mælst á einu ári frá árinu 2007. Þetta kemur fram í greiningu Íslandsbanka, en þar er einnig bent á að þessi aukni hagvöxtur dragi úr framleiðsluslakanum og geti þannig ýtt á að stýrivextir verði hækkaðir að öðru óbreyttu.

Það sem skapar hagvöxt síðasta árs er að miklu leyti utanríkisviðskipti, enda standa þjóðarútgjöld nánast í stað og einkaneyslan jókst aðeins um 1,2%. Segir greiningardeildin að afgangur af undirliggjandi viðskiptajöfnuði hafi aukist töluvert milli áranna 2012 og 2013 og mælst 6,4% af landsframleiðslu í fyrra, en það er mesti afgangur sem mælst hefur frá því að gerð þjóðhagsreikninga hófst árið 1945.

Greiningardeildin bendir á að í nýjustu spá Seðlabankans hafi hann reiknað með að slakinn á síðasta ári hafi verið tæplega 1%, en miðað við nýbirtar tölur er ljóst að hann er nær 0,5%. Rifjað er upp að peningastefnunefnd SÍ hefur sagt í yfirlýsingum sínum undanfarið að eftir því sem slakinn hverfi úr hagkerfinu sé rétt að slakinn hverfi einnig úr peningastjórnuninni, þ.e. að raunstýrivextir hækki. 

• 1 blogg um fréttina

Bloggað um fréttina

• Páll Vilhjálmsson: Friður og hagsæld á Íslandi, stríð og eymd í Evrópu