Verðbólgumarkmið í höfn

Verðbólgan mældist undir 2,5% verðbólgumarkmiði Seðlabanka Íslands nú í marsmánuði, annan mánuðinn í röð, og er útlit fyrir að hún verði á svipuðum slóðum fram eftir ári.

Þetta segir í Morgunkorni Greiningar Íslandsbanka.

Samkvæmt nýbirtum tölum Hagstofunnar hækkaði vísitala neysluverðs (VNV) um 0,24% í mars frá fyrri mánuði. Mælingin var lítið eitt undir spá greiningardeildarinnar, 0,3% hækkun, en opinberar spár voru á bilinu 0,1% - 0,4% hækkun.

Verðbólga síðustu tólf mánaða mælist nú 2,2%, en var 2,1% í febrúar. Raunar er tólf mánaða taktur verðbólgu án húsnæðis 0,8%, og því er drjúgur meirihluti verðbólgunnar nú til kominn vegna hækkandi íbúða- og leiguverðs, að því er fram kemur í umfjöllun greiningardeildarinnar.

Útsölulok vógu til hækkunar

„Að vanda vógu útsölulok til hækkunar VNV í mars. Verð á fötum og skóm hækkaði um 3,9% milli mánaða í mars, sem hefur áhrif til um 0,19% hækkunar VNV. Í heild vó verðhækkun vegna útsöluloka til 0,22% hækkunar VNV, sem er aðeins meira en við bjuggumst við,“ segir greiningardeildin.

„Á móti hækkun á fötum lækkaði verð á raftækjum um 0,6% milli mánaða sem kom okkur óvart, en sú lækkun stafar eflaust af styrkingu á gengi krónunnar og jafnvel gætir hér áhrifa af aukinni samkeppni verslana hér á landi við erlendar netverslanir,“ bætir hún við.

• 1 blogg um fréttina

Bloggað um fréttina

• Guðmundur Ásgeirsson: Rök fyrir afnámi verðtryggingar