Viðskipti | mbl | 25.4.2014 | 12:56

Vinnan við skráningu líktist vertíð

Við skráningu HB Granda á aðalmarkað Kauphallarinnar í morgun. Vilhjálmur Vilhjálmsson, forstjóri fyrirtækisins, hringir viðskipti dagsins inn. Mynd/Þórður Þórðarson

Með skráningu HB Granda á aðalmarkað fæst gott tækifæri til að fjölga í hluthafahóp félagsins, en nokkuð fáir eigendur hafa verið á bakvið það síðustu ár. Félagið er ekki alveg nýtt á hlutabréfamarkaði, heldur hefur það verið skráð í um 20 ár, en fyrir átta árum færði það sig niður á First North markaðinn í stað þess að vera á aðalmarkaði. Vilhjálmur Vilhjálmsson, forstjóri HB Granda, segir að ekki sé horft til þess að auka hlutafé eða ráðast í fjárfestingar með nýju hlutafé, enda telji þeir lánsfé vera hagstæðara en að auka hlutafé.

Vinna við skráningu líktist vertíð

Vilhjálmur segir að skráningin hafi verið til umræðu í langan tíma, en svo hafi málið verið keyrt í gegn þegar niðurstaða var komin. „Þegar ákvörðunin lá fyrir var hún einföld, þetta var búið að vera í umræðunni í langan tíma en ákvörðunin var tekin í haust og síðan þá hefur þetta gengið hratt fyrir sig,“ segir Vilhjálmur. Við skráninguna sagði hann að vinna síðustu mánaða hefði verið eins og vertíð og mikið púður farið í að undirbúa hana.

Lánsfé ódýrara en aukið hlutafé

Félagið hefur verið á markaði síðustu 20 árin, fyrst á aðalmarkaði en fór niður á First North markaðinn árið 2006 þegar yfirtökuskylda var að myndast á meirihlutaeigendur. Vilhjálmur segir góðan tímapunkt núna að færa sig upp aftur. „Nú er álitið gott tækifæri til að koma félaginu á fleiri eigendur,“ segir hann.

Aðalástæðan fyrir skráningunni er dreifing eignarhalds að hans sögn, en Arion banki vildi selja um 20% af hlut sínum í félaginu. „Þetta er eingöngu til að dreifa eignarhaldinu og það er ekki verið að horfa til hlutafjáraukningar. Við teljum, eins og staðan er í dag, að lánsfé sé ódýrari kostur fyrir félagið en aukið hlutafé og þá er eiginfjárstaðan líka sterk,“ segir Vilhjálmur.

Á réttri leið með veiðigjaldið

Í vikunni var lagt fram frumvarp ríkisstjórnarinnar um breytingu á lögum um veiðigjöld. Vilhjálmur segir þróunina vera í rétta átt, bæði varðandi tilhögun veiðigjalda og fiskveiðifrumvarpsins. „Það verður aldrei sátt um upphæðina, en aðferðin sem notuð er núna hefur tekið stórstígum framförum og er stórt skref í rétta átt miðað við það sem áður var. Að henda burt þessum þorskígildisstuðlum og fara inn í afkomu einstakra tegunda, við teljum það vera mikið framfaraskref sem kemur mun sanngjarnara út,“ segir Vilhjálmur.