Hærri laun, verri forstjórar

Því hærri sem laun forstjóra stórfyrirtækja eru þeim mun verri afkomu skila þau næstu þrjú árin. Ástæða þess er talin vera of mikið sjálfsálit hjá þeim sem eru komnir á toppinn hjá stærstu fyrirtækjunum. Þetta kemur fram í nýrri rannsókn sem tímaritið Forbes greinir frá. Skoðuð voru 1.500 skráð stórfyrirtæki á 20 ára tímabili, en horft var til launagreiðsla til stjórnenda og árangurs fyrirtækisins næstu þrjú ár þar á eftir. 

Fylgnin milli hárra launa og lélegs árangurs var sérstaklega sterk hjá 150 stærstu fyrirtækjunum og segir í frétt Forbes að með hærri launum verði stjórnendur svo öruggir með eigið ágæti að þeir hunsi gagnrýni og neikvæðar fréttir. Þá fjárfesti þeir of mikið og í lélegum verkefnum. 

Þá var einnig að finna fylgni milli þess sem forstjórar voru lengi við stjórnvölin og þess hvernig fyrirtækjunum gekk. Þannig voru forstjórar sem sátu lengi í forstjórastólnum líklegri til að safna að sér stjórnarmeðlimum sem höfðu svipaða sýn á reksturinn og voru líklegir til að samþykkja slæmar ákvarðanir gagnrýnilaust. Var frammistaða fyrirtækja sem höfðu haft sama forstjórann í langan tíma 22% verri en annarra fyrirtækja. 

Ofurlaun forstjóra hafa lengi verið réttlætt með því að þeir skili fyrirtækjunum miklu til baka í formi betri rekstrar. Þessi rannsókn virðist aftur á móti kollvarpa þeirri tilgátu, jafnvel þótt finna megi dæmi um ofurlaunaða forstjóra sem hafa skilað góðu búi. Í heild skila þau 10% fyrirtækja sem eru með hæstu forstjóralaunin 10% minni arðsemi til fjárfesta en meðaltal allra fyrirtækjanna. Arðsemin var svo 15% minni hjá þeim 5% fyrirtækja sem höfðu hæstu forstjóralaunin. 

• 1 blogg um fréttina

Bloggað um fréttina

• Gunnar Heiðarsson: Lækka laun allra forstjóra og stjórnarmanna um 50%