Viðskipti | mbl | 3.7.2014 | 16:32

Lögum ekki breytt fyrir eitt fyrirtæki

Unnur Brá segir að lögum verði ekki breytt fyrir eitt fyrirtæki.

„Það er enginn að horfa á breyta þessu fyrir eitt fyrirtæki. Það væri bara mjög óeðlilegt.“ Þetta segir Unnur Brá Konráðsdóttir, þingmaður Sjálfstæðisflokksins, en hún er einnig formaður allsherjarnefndar og nefndarmaður í velferðarnefnd. Hún svarar þar spurningum hvort farið verði í sérstakar undanþágur fyrir verslunina Costco, en í sjónvarpsfréttum Ríkisútvarpsins var sagt frá því að verslunin hefði óskað eftir að fá að flytja inn frosið kjöt og selja áfengi og lyf í búðum sínum.

Hún segir aftur á móti að vonandi leiði þetta til þess að liðkað verði fyrir meira frelsi í viðskiptum og að eðlilegt sé að ríkisstjórnin muni vinna að því á næstunni. „Þetta eru spurningar fyrir komandi þingvetur,“ segir hún, en aðspurð hvort hún telji líklegt að lögum um áfengissölu verði breytt segist hún telja svo. „Já, eigum við ekki bara að vera bjartsýn.“

Vill leyfa lausasölulyf utan apóteka

Umræðan um komu Costco hefur einnig opnað á hugmyndir um sölu lyfja utan apóteka. Unnur segir að það sé í sjálfu sér mjög neytendavænt og gott að geta gripið lyf á sama stað og önnur innkaup heimilisins eru gerð. Hún vill að byrjað verði á því að skoða hvort að hægt sé að leyfa sölu lausasölulyfja sem ekki eru lyfseðilskyld utan apóteka.

Unnur segir innflutning á frosnu kjöti aftur á móti snúast um mun stærri spurningar og vera erfiðasta málið af þessum þremur. „Við erum ekki ein á báti við að heimila ekki innflutning á frosnu kjöti,“ segir hún og bendir á að reglur í Kanada séu t.a.m. mun strangari í þessa veru. Hún segir að samningar um þessi málefni kalli alltaf á stærri viðræður um hvaða landbúnaðarvörur megi flytja inn og út. „Það er samt frábært að það sé verið að hreyfa við umræðunni,“ segir Unnur.