Nýtt hvalaskoðunarskip á Akranesi

Um helgina eru Írskir dagar, bæjarhátíð Akurnesinga, haldnir hátíðlegir og nær hún hápunkti á morgun þegar nýtt hvalaskoðunar- og sjóstangveiðiskip verður tekið í notkun. Skipið hefur fengið nafnið Gullfoss, en það kom til landsins fyrir skömmu. 

Skipið mun fara jómfrúarferðina á morgun og tvær til. Farið verður frá Akraneshöfn kl. 13, 15 og 17. „Báturinn fékk haffærisskírteinið í dag svo þetta rétt náðist fyrir Írsku dagana,“ segir Gunnar Leifur Stefánsson, einn af eigendum Gullfoss. Báturinn var áður notaður sem farþegabátur í Pool á Englandi.

„Við keyptum hann í vor, sigldum honum heim til Íslands og höfum verið að setja hann í sparifötin að undanförnu, mála og setja hann í stand.“ Báturinn tekur 100 farþega auk þess sem 25 veiðistangir eru um borð. „Þetta verður eini báturinn sem getur boðið upp á þessa blöndu, þ.e. bæði hvalaskoðun og sjóstangveiði. Svo er aflinn grillaður og borðaður á heimleiðinni,“ segir Gunnar.

Báturinn verður gerður út frá Akranesi. „Við erum að hefja mikla uppbyggingu í ferðaþjónustunni hér sem innifelur meðal annars í sér samstarf við aðila í Borgarfirði og á Snæfellsnesi. Hugmyndin er að þjappa þessu saman og búa til það sem við ætlum að kalla „demantshringinn,“ segir Gunnar.

Írskir dagar hófust í gær og standa fram á sunnudag. Sem fyrr segir nær hátíðin hámarki á morgun en meðal þess sem verður í boði er bryggjusund, dorgveiðikeppni, handverksmarkaður, matar- og antikmarkaður, sandkastalakeppni, brekkusöngur, tívolí auk þess sem keppt verður um hinn landsfræga titil, rauðhærðasti Íslendingurinn. Dagskrá hátíðarinnar í heild er að finna á www.irskirdagar.is. 

Hvalaskoðunar- og sjóstangveiðiskipið Gullfoss.

• 1 blogg um fréttina

Bloggað um fréttina

• Haraldur Haraldsson: Nýtt hvalaskoðunarskip á Akranesi:Þetta gott framtak Skagamanna!!!