Íbúðaverð lækkar tvo mánuði í röð

Vísitala íbúðaverðs lækkar um tæpt prósent milli mánaða. Vísitalan lækkaði um 0,8% í júní, sem er mesta lækkun milli mánaða frá því í desember 2010. Þetta kemur fram í Hagsjá hagfræðideildar Landsbankans um fasteignamarkaðinn.

Íbúðaverð lækkaði einnig í maí og er þetta í fyrsta skipti frá árinu 2010 sem íbúðaverð lækkar tvo mánuði í röð. Íbúðaverð hefur verið á nokkru skriði upp á við fyrstu tvo ársfjórðunga ársins 2014. Íbúðaverð var í júní 6,8% hærra en fyrir ári síðan, í samanburði var árshækkunin rúmlega 11% í mars og apríl.

Mikill munur á verðþróun sérbýlis og fjölbýlis

Lækkunin undanfarna tvo mánuði er nær eingöngu vegna lækkana á verði sérbýlis, en sérbýli hefur lækkað um alls 4,3% síðan í apríl. Enn heldur áfram að draga í sundur með fjölbýli og sérbýli en sú þróun hófst um mitt ár 2012. Undanfarið ár hefur verð sérbýlis einungis hækkað um 0,5% á sama tíma og verð fjölbýlis hefur hækkað um 9,0%.

Nokkrar sveiflur geta verið í íbúðaverði og því betra að líta yfir lengra tímabil til þess að eyða skammtímasveiflum. Það má velta því fyrir sér hvort krafturinn í verðhækkunum hafi náð tímabundnu þaki líkt og gerðist árið 2012, þá fór að draga mjög úr verðhækkunum og líkt og nú var skýringuna helst að finna í verðþróun á sérbýli.

Eina ástæðu þess að dregið hafi úr verðhækkunum á sérbýli gæti verið að finna í gjaldeyrisútboðum Seðlabankans, að mati hagfræðideildarinnar. Töluverður afsláttur fékkst af verði íbúða fyrir einstaklinga sem fóru þá leið. Mögulega hefur stór hluti þeirra sem komu inn með gjaldeyri á þennan hátt fjárfest í sérbýli, sem eru alla jafna dýrari eignir. Minni afsláttur á þennan máta hefur því áhrif á fasteignaverð á dýrari endanum.

• 1 blogg um fréttina

Bloggað um fréttina

• Haraldur Haraldsson: Íbúðaverð lækkar tvo mánuði í röð/Trúum við þessu það held …