Smáís tekið til gjaldþrotaskipta

Þrotabú Smáís, Samtaka myndrétthafa á Íslandi, var tekið til gjaldþrotaskipta þann 27. ágúst með úrskurði héraðsdóms Reykjavíkur. Skorað var á kröfuhafa að lýsa kröfum innan tveggja mánaða í Lögbirtingarblaðinu í dag.

Stjórn Smáís óskaði eftir gjaldþrotaskiptunum um miðjan ágúst og var ástæðan sögð vera brot Snæ­bjarnar Stein­gríms­sonar, fyrrverandi framkvæmdastjóra samtakanna. Rúv greindi frá því að staðhæft væri í skiptabeiðninni að ársreikningar félagsins hefðu verið falsaðir um árabil, opinberum gjöldum hefði ekki verið skilað með réttum hætti og vanrækt hefði verið að færa bókhald. Þá var framkvæmdastjórinn sagður hafa viðurkennt fjárdrátt fyrir stjórninni.

Mbl.is greindi frá því í maí að stjórn Smáís hefði kært Snæ­björn til embættis sér­staks sak­sókn­ara. Í tilkynningu samtakanna sagði að ákvörðunin hefði verið tekin eftir að fjár­reiður sam­tak­anna voru skoðuð við starfs­lok Snæ­björns.

Smáís voru stofnuð árið 1992 til þess að gæta hagsmuna rétthafa myndefnis á Íslandi. Hafa þau í gegnum tíðina meðal annars krafist lögbanns á skráardeilisíðurnar Pirate Bay og Deildu.net. Meðlimir Smáís eru Samfélagið, Sena, Myndform, 365 Miðlar, Rúv og Skjárinn.

• 1 blogg um fréttina

Bloggað um fréttina

• Jóhann Elíasson: EKKI HEFUR ENDURSKOÐUN ÁRSREIKNINGA FÉLAGSINS VERIÐ UPP Á MARGA FISKA