Viðskipti | mbl | 12.9.2014 | 10:08

Framlenging skuldabréfa lykilatriði

Landsbankinn, aðalútibú Austurstræti Kristinn Ingvarsson

Framlenging skuldabréfa á milli gamla og nýja Landsbankans gegnir lykilhlutverki fyrir fjármálastöðugleika á Íslandi að sögn Seðlabanka Íslands en til þess að af framlengingunni geti orðið þurfa stjórnvöld að fallast á að veita, LBI, sem er þrotabú gamla Landsbankans, ákveðnar undanþágur frá gjaldeyrishöftunum. Tími stjórnvalda til þess að svara rennur út í lok september.

Þetta kemur fram í frétt Bloomberg fréttastofunnar.

Skuldabréfið sem hljóðar upp á 226 milljarða var upphaflega á gjalddaga árið 2018 en samkomulag náðist í sl. maí um að færa hann aftur um átta ár og hafa hann árið 2026 í staðinn.

Samkvæmt breytingum á lögum um gjaldeyrismál í mars 2013 eru allar undanþágur frá höftum sem eru að hærri fjárhæð en 25 milljarðar jafnframt háðar samráði Seðlabankans við fjármálaráðherra og að undangenginni kynningu á efnahagslegum áhrifum fyrir efnahags- og viðskiptanefnd Alþingis. Þá segir í gjaldeyrislögum að við mat á undanþágu skuli líta til þess „hvaða afleiðingar takmarkanir á fjármagnshreyfingum hafa fyrir umsækjanda, hvaða markmið eru að baki takmörkunum og hvaða áhrif undanþága hefur á stöðugleika í gengis- og peningamálum.“

Gætu orðið pólitískar hindranir

Í frétt Bloomberg er haft eftir Sigríði Benediktsdóttur, framkvæmdastjóra stöðugleikasviðs Seðlabanka Íslands, að það gæti verið gott fyrir stöðugleika að framlengja bréfið en hins vegar þyrfti að taka tillit til annarra sjónarmiða, líkt og pólitískra.

Undanþágur þurfa líkt og að framan greinir að vera gerðar í samráði við stjórnvöld en hugmyndin hefur hingað til ekki hlotið náð fyrir þeirra eyrum. Í maí sl. sagði t.a.m. Sigmundur Davíð Gunnlaugsson, forsætisráðherra, í viðtali í hádegisfréttum Rúv að ekki kæmi til greina að veita slitastjórn gamla Landsbankans einum undanþágu frá fjármagnshöftum án þess heildarlausn náist.