Lúxusíbúðir seljast hratt

Þegar er búið að selja ríflega helming íbúða í nýjum 11 hæða íbúðaturni við Lindargötu í Reykjavík en þær voru auglýstar til sölu laugardaginn 13. september. Það tók því aðeins rúma viku að selja íbúðirnar.

Samkvæmt vefnum Skuggi.is eru 19 af 36 íbúðum í turninum seldar. Verð seldra íbúða er ekki gefið upp. Íbúðirnar 19 sem eru seldar eru alls 1.961 fermetri og má áætla að söluverðið sé um 1.200 milljónir króna.

Dýrasta óselda íbúðin í turninum er á 10. hæð og er ásett verð 183,8 milljónir. Íbúðin er 255,6 fermetrar og kostar fermetrinn 720 þúsund.