Íbúðalánasjóður selur 400 íbúðir

Íbúðalánasjóður hefur ákveðið að setja 400 íbúðir úr eignasafni sjóðsins í sérstakt söluferli. Formlegt söluferli hefst þann 17. október og þá geta væntanlegir kaupendur nálgast ítarlega upplýsingaskýrslu um söluferlið og eignirnar á heimasíðu Íbúðalánasjóðs, segir í fréttatilkynningu frá sjóðnum.

Íbúðalánasjóður mun bjóða íbúðirnar til sölu í sjö eignasöfnum, en tilboðsgjafar geta boðið í eitt eða fleiri söfn. Þær 400 íbúðir sem boðnar verða til sölu í eignasöfnunum sjö eru staðsettar á Austurlandi, Norðurlandi, Vesturlandi, Suðurlandi, Suðurnesjum og á höfuðborgarsvæðinu. Fasteignamat þeirra er um 6,5 milljarðar króna.

Sjóðurinn gerir þá kröfu til þeirra sem bjóða í eignirnar að þeir geri grein fyrir því hvernig þeir ætla að viðhalda útleigu íbúðanna og að þeir hafi trausta getu til fjármögnunar kaupanna, segir í tilkynningunni.

Flestar þegar í útleigu

Á síðustu árum hefur Íbúðalánasjóður eignast margar íbúðir. Í tilkynningu segir að sjóðurinn hafi lagt mikla áherslu á að tryggja búsetuöryggi þeirra einstaklinga og fjölskyldna sem í þeim búa þegar hann hefur eignast þær.

Flestar þeirra eigna sem fara í söluferli að þessu sinni eru nú þegar í útleigu og margar þeirra voru byggðar sérstaklega sem leiguíbúðir. Við söluna er lagt til grundvallar að þær verði einungis seldar til aðila sem ætla að reka þær áfram til útleigu. Á þennan hátt vill Íbúðalánasjóður stuðla að uppbyggingu leigumarkaðar á Íslandi með húsnæðisöryggi þeirra sem búa í eignunum að leiðarljósi.

Áhugasömum kaupendum verður boðið til kynningarfundar þriðjudaginn 14. október nk. kl. 9 í húsnæði Capacent að Ármúla 13 í Reykjavík. Þeir sem hyggjast sækja fundinn verða að skrá sig til þátttöku fyrir lok mánudagsins 13. október. Skráning fer fram á heimasíðu Íbúðalánasjóðs undir tenglinum „Sala sjö fasteignasafna – skráning á kynningarfund“. Á fundinum verður farið yfir söluferlið og fasteignasöfnunum lýst nánar.

• 1 blogg um fréttina

Bloggað um fréttina

• Þorsteinn Valur Baldvinsson: Líklega einn stærsti þjófnaður Íslandssögunar